ही गोष्ट आहे आकांक्षा प्रभुणे या एका मराठी मुलीची. चित्रपट क्षेत्राची कोणतीही कौटुंबिक पार्श्वभूमी नसूनही या क्षेत्रातच करिअर करण्याची आकांक्षा तिने जिद्दीने पूर्ण केली. अमेरिकेत या क्षेत्रातील पदव्युत्तर शिक्षण घेऊन तिथे तिने फिल्ममेकर म्हणून आपली कारकीर्द सुरू केली आहे. ‘रिझॉल्व्ह’ या तिच्या शॉर्टफिल्मची रोमच्या प्रिझ्मा इंडिपेंडंट फिल्म अॅवॉर्ड फेस्टिव्हलसाठी निवड झाली आहे. इतरही अनेक प्रोजेक्ट्सवर ती काम करते आहे. तिच्या प्रेरणादायी प्रवासाबद्दल... .............
जिद्द, नवनवे शिकण्याची वृत्ती आणि एखाद्या ध्येयासाठी कष्ट घेण्याची तयारी हे गुण जर व्यक्तिमत्त्वात असतील, तर गगन ठेंगणे करण्याएवढे कर्तृत्व गाजवता येते. त्यात कुटुंबाचे आणि मित्र-मैत्रिणींचे उत्तम पाठबळ असेल, तर अगदी वेगळ्या क्षेत्रातही चांगले यश संपादन करण्याचा मार्ग आणखी सुकर होतो. पुण्यातील आकांक्षा सचिन प्रभुणे हिची गोष्ट वाचल्यावर तुम्हालाही हे नक्की पटेल.
पत्रकारिता, टेलिव्हिजन किंवा सिनेमा क्षेत्रात कुटुंबातील कोणतीही व्यक्ती कार्यरत नसतानाही आपण फिल्ममेकरच व्हायचे, असे ध्येय आकांक्षाने ठेवले होते. माहिती-तंत्रज्ञान विषयात पदवी घेतल्यानंतर २०१५मध्ये आकांक्षाने अमेरिकेतील लॉस एंजलीसमधील कॅलिफोर्निया स्टेट युर्निव्हर्सिटीत ‘मास्टर आफ फाइन आर्टस् इन टेलिव्हिजन, फिल्म अँड थिएटर’ या पदव्युत्तर पदवी अभ्यासक्रमासाठी प्रवेश घेतला.
‘या क्षेत्रात माझ्या परिचयाचे असे कोणीच नव्हते. तसेच मला या क्षेत्राची कौटुंबिक पार्श्वभूमीदेखील नाही. त्यामुळे अगदी शून्यापासून सुरुवात करावी लागली. परदेशात राहून एका नव्या आणि अनोळखी क्षेत्राचा अभ्यास करणे आणि त्यातूनच करिअरला आकार देणे या गोष्टी मला पहिल्यांदा खूपच अवघड गेल्या. परंतु सर्व अडचणींना मी धैर्याने तोंड दिले आणि यशस्वी ठरले,’ असे आकांक्षा सांगते.
अभ्यासक्रमाचा एक भाग म्हणून आकांक्षाने प्रथम सायन्स फिक्शनवरील शॉर्टफिल्मचे लेखन केले. तिथूनच तिचा खरा प्रवास सुरू झाला. स्थलांतरित आईच्या मृत्यूची वेदना आणि त्यासाठी तिच्या मुलीने घेतला सूड असा आशय असलेल्या ‘रिझॉल्व्ह’ या शॉर्टफिल्मची तिने निर्मिती केली. त्यानंतर ‘सोशल अँक्झायटी’ हा मनोविकार असलेल्या स्त्रीचे चित्रण करणाऱ्या ‘गोइंग आउट’ या शॉर्टफिल्मची तिने निर्मिती केली. या फिल्मचे काम नुकतेच पूर्ण झाले असून, ती फिल्म फेस्टिव्हलमध्ये पाठवली जाणार आहे. याचबरोबर ‘दी इनफिलटॅटर्स’ या चित्रपटाच्या टीममध्येही ती सहभागी झाली होती. या सिनेमाला यंदाच्या सनडान्स फिल्म फेस्टिव्हलमध्ये अनेक पुरस्कार मिळाले. लॉस एंजलीस लॅटिनो इंटरनॅशनल फिल्म फेस्टिव्हल आणि मायामी फिल्म फेस्टिव्हलमध्ये या चित्रपटाचे स्क्रीनिंग झाले. अॅशलँड इंडिपेंडंट फिल्म फेस्टिव्हलमध्येदेखील या चित्रपटाला पुरस्काराने गौरविण्यात आले. एप्रिल २०१९मध्ये झालेल्या इंडियन फिल्म फेस्टिव्हल ऑफ लॉस एंजलीस (आयएफएफएलए) या उपक्रमाच्या प्रोडक्शन टीममध्येही आकांक्षाचा सहभाग होता.
‘सप्टेंबर २०१८ ते मे २०१९ हा कालावधी माझ्यासाठी खूपच खास होता. या कालावधीत नॅशनल जिओग्राफिक वाइल्ड या चॅनेलवर प्रदर्शित होणाऱ्या ‘हवी मँडेल्स अॅनिमल्स डुइंग थिंग्ज – सीझन टू’ या कॉमेडी शोसाठी सहनिर्माती म्हणून काम करण्याची संधी मला मिळाली. प्रख्यात विनोदी अभिनेते हवी मँडेल या शोचे कार्यकारी निर्माते होते. त्यानंतर ऑक्सिजन टीव्हीवर प्रसारित होणाऱ्या ‘ए वेडिंग अँड ए मर्डर’ या क्राइम शोसाठीही मी सहनिर्माती म्हणून काम केले. हादेखील माझ्यासाठी वेगळा अनुभव होता,’ असे आकांक्षा सांगते. यंदाच्या स्मार्ट फिल्म फेस्टिव्हलमध्ये फायनलिस्ट ठरलेल्या ‘राइट’ या चित्रपटाची निर्मितीदेखील आकांक्षाने केली आहे.
हे सर्व काम सुरू असताना
‘रिझॉल्व्ह’ या शॉर्टफिल्मने आकांक्षाला यशाची दारे खऱ्या अर्थाने उघडून दिली. या शॉर्टफिल्मचे २०१८मध्ये दिल्ली शॉर्टफिल्म इंटरनॅशनल फिल्म फेस्टिव्हलमध्ये, तर २०१९मध्ये ओअॅसिस फिल्म स्क्रीनिंग सीरिज, इंडियन वर्ल्ड फिल्म फेस्टिव्हल, अनरिस्ट्रिक्टेड व्ह्यू फिल्म फेस्टिव्हल, बेस्ट शॉर्टस् कॉम्पिटिशन, अॅकोलेड ग्लोबल फिल्म फेस्टिव्हल, व्हेगस मूव्ही अॅवॉर्डस्, प्रिझ्मा इंडिपेंडंट फिल्म अॅवॉर्डस् इन रोम या सगळ्या फेस्टिव्हलमध्ये स्क्रीनिंगसाठी अधिकृत निवड झाली आहे. याव्यतिरिक्त लॉस एंजलीसमधील रिगल एलए लाइव्ह या प्रख्यात थिएटरमध्ये या शॉर्टफिल्मचा प्रीमिअर झाला. एप्रिलमध्ये लंडनमधील ‘हेन अँड चिकन’ थिएटरमध्ये या फिल्मचे स्क्रीनिंग झाले.
‘या निमित्ताने मला विविध फिल्म फेस्टिव्हल्सना उपस्थित राहण्याची, तसेच प्रख्यात फिल्ममेकर्सशी संवाद साधण्याची आणि त्यांच्याकडून अनेक गोष्टी आत्मसात करण्याची संधी मिळाली,’ असे आकांक्षाने सांगितले. अमेरिकेतील टेलिव्हिजन आणि फिल्म इंडस्ट्रीतील भारतीय वंशाचे अभिनेते, लेखक आणि दिग्दर्शकांच्या मुलाखतींवर आधारित संहितेवर निर्माती म्हणूनही आकांक्षा काम करतेय. ही मालिका यू-ट्यूबवर प्रसारित होणार आहे. तसेच अमेरिकेतील शहरांमधील पर्यटनावर आधारित असलेल्या एका शोची निर्मितीदेखील ती करते आहे.
‘भविष्यात मला सर्वच शैलींवर (जॉनर्स) लेखक आणि निर्माती म्हणून काम करायचे आहे. तसेच हॉलिवूड आणि बॉलिवूडमध्येदेखील काम करण्याची माझी इच्छा आहे. कोणताही प्रोजेक्ट सुरू करताना मी सर्वाधिक प्राधान्य संहितेला (स्क्रिप्ट) देते. त्यामुळेच उत्तम कलाकृती तयार होते, असे मला वाटते,’ असे आकांक्षाने सांगितले.
‘फिल्म इंडस्ट्रीत येताना तुम्हाला अनेक जण सांगतात, की या क्षेत्रातील माणसे आणि संस्कृती चांगली नसते; पण मला आलेला अनुभव अत्यंत सुखद आहे. मी अनेक कलाकार, तंत्रज्ञांबरोबर काम केले आहे. आपले काम आणि वैयक्तिक आयुष्य यांतील समतोल उत्तम पद्धतीने सांभाळणारी आणि मार्गदर्शन करणारी माणसे मला अमेरिकेत भेटली. त्यामुळेच या क्षेत्रातील कोणतीही पार्श्वभूमी नसतानाही मी यश मिळवू शकले,’ असे आकांक्षा आवर्जून नमूद करते.
तिच्या पुढील वाटचालीसाठी शुभेच्छा!